ភ្នំពេញ៖ លោក ថោង ខុន រដ្ឋមន្រ្តីក្រសួងទេសចរណ៍ និងជាអនុប្រធានអចិន្ដ្រៃយ៍គណៈកម្មធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានដឹកនាំកិច្ចប្រជុំប្រចាំសប្តាហ៍មួយនៅថ្ងៃទី២៧ ខែកក្កដា ឆ្នាំ២០២១នេះ ដើម្បីត្រួតពិនិត្យ និងជំរុញការងារ ក្នុងទិសដៅពង្រឹងផែនការត្រៀមឆ្ពោះទៅរកភាពជោគជ័យនៃការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ។

កិច្ចប្រជុំប្រចាំសប្តាហ៍នេះ ត្រូវបានធ្វើឡើងដោយលើកយកនូវរបៀបវារៈសំខាន់ៗចំនួន ៣ ដូចជា ការត្រួតពិនិត្យរបាយការណ៍ការងារឆមាសទី១ ការត្រួតពិនិត្យដំណើរការរៀបចំទីលានសម្រាប់ការប្រកួត និងពិភាក្សាអំពីការត្រួតពិនិត្យ និងគ្រប់គ្រងពហុកីឡដ្ឋានជាតិមរតកតេជោ បន្ទាប់ពីសាងសង់រួចជាស្ថាពរ នាពេលឆាប់ៗខាងមុខនេះ។

បន្ថែមពីលើនេះ កិច្ចប្រជុំក៏បានពិនិត្យ និងពិភាក្សាអំពីផែនការពិធីបើក-បិទព្រឹត្តិការណ៍ស៊ីហ្គេម ការងារពន្លឿនការសាងសង់ភូមិកីឡា និងការត្រៀមបញ្ជូនអត្តពលិកទៅហ្វឹកហាត់នៅប្រទេសចិននាពេលខាងមុខផងដែរ។ ក្រៅពីនេះ ភាគីពាក់ព័ន្ធក៏បានពិភាក្សាបន្ថែមលើកម្មវិធីសុំភ្លើងអាទិទេពកីឡា ស៊ីហ្គេម-អាស៊ានប៉ារ៉ាហ្គេម និងដំណើរផ្លូវរត់ភ្លើងគប់ ដោយរដ្ឋាភិបាលបានជ្រើសរើសផែនការក្នុងការសុំភ្លើងពីអាទិទេពនៅក្នុងខេត្តសៀមរាប មុននឹងបន្តដង្ហែរភ្លើងគប់នេះ នៅតាមបណ្តាប្រទេសនានាជាសមាជិកអាស៊ីអាគ្នេយ៍ រួចដង្ហែរចូលមកកម្ពុជាវិញ ដោយរត់ជុំវិញខេត្តជាប់បឹងទន្លេសាប មុននឹងដង្ហែរចូលមកកាន់ពហុកីឡដ្ឋានជាតិមរតកតេជោដែលជាកន្លែងប្រារព្ធពិធីបើកការប្រកួតកីឡាស៊ីហ្គេមផ្លូវការ នៅថ្ងៃទី០៥ ខែឧសភា ឆ្នាំ២០២៣ ៕